Yoshlar - kelajagimiz ️️️

🗣️Prezident Murojaatnomasi - yoshlar kelajagi uchun aniqlik va mas'uliyat mezoni

O‘zbekiston Respublikasi Prezidenti Shavkat Mirziyoyevning Oliy Majlis va O‘zbekiston xalqiga yo‘llagan Murojaatnomasi mamlakatimizni rivojlantirishda, ayniqsa, yoshlar siyosatini yangi bosqichga olib chiqishda muhim dasturilamal bo‘lib xizmat qilmoqda. Davlatimiz rahbari Murojaatnomada yoshlar masalasini strategik ustuvor yo‘nalish sifatida belgilab, bu boradagi vazifalarni aniq maqsad va raqamlar bilan ko‘rsatib berdi.

Prezidentimiz ta’kidlaganidek: “Yoshlar — Yangi O‘zbekistonning eng katta boyligi, bebaho zaxirasi va tayanch kuchidir.” Mazkur fikr davlat siyosatining markazida aynan yoshlar turganini yaqqol ifodalaydi. Murojaatnomada qayd etilganidek, bugungi kunda yalpi ichki mahsulot hajmi 145 milliard AQSh dollaridan oshgani, aholi soni 38 milliondan ziyod bo‘lgani mamlakatimizning barqaror taraqqiyot yo‘lidan izchil rivojlanayotganini ko‘rsatadi. Bunday o‘sish sur’atlari yoshlarning bilimli, kasb-hunarli va tashabbuskor bo‘lib kamol topishiga bevosita bog‘liq ekani alohida urg‘u bilan ta’kidlandi. Davlatimiz rahbari Murojaatnomada yoshlar bandligi masalasiga alohida to‘xtalib, shunday dedi: “Har bir yoshning taqdiri, uning bilim olishi, kasb egallashi va jamiyatda o‘z o‘rnini topishi doimiy e’tiborimiz markazida bo‘ladi.” Shuningdek, “O‘zbekiston — 2030” strategiyasi doirasida yoshlarni zamonaviy bilim va kasblarga yo‘naltirish, ularning tadbirkorlik tashabbuslarini qo‘llab-quvvatlash, mahallalarda manzilli ishlash tizimini yanada kuchaytirish ustuvor vazifa sifatida belgilandi. Bu borada Prezidentimiz: “Yoshlar bilan ishlashda qog‘ozbozlik emas, aniq natija va mas’uliyat bo‘lishi shart,” — deya qat’iy vazifalarni belgilab berdi. Mazkur vazifalar ijrosini ta’minlashda mahalla yoshlar yetakchilari alohida o‘rin tutadi. Har bir yoshni e’tibordan chetda qoldirmaslik, band bo‘lmagan yigit-qizlar bilan individual ishlash, ularni o‘qish va kasbga yo‘naltirish, ijtimoiy faolligini oshirish bugungi kunning dolzarb talabidir. Xulosa qilib aytganda, Prezidentimiz Murojaatnomasida yoshlarga doir belgilab berilgan vazifalar mahalla yoshlar yetakchilari uchun aniq yo‘l xaritasi bo‘lib xizmat qiladi. Ushbu vazifalarning to‘liq va samarali amalga oshirilishi yoshlar salohiyatini ro‘yobga chiqarish, Yangi O‘zbekiston taraqqiyotiga munosib hissa qo‘shish va mustahkam kelajak poydevorini yaratishga xizmat qiladi. Shavkat Rahmonov, Viloyat Yoshlar ishlari boshqarmasi boshlig‘i Buxoro.uz | Facebook | Instagram | YouTube