አዲስ ነገር መረጃ

"ቆሻሻው ተንሸራቶ በሁለት ሰዎች የሞት አደጋ አድርሷል። ሰዎቹን ለማውጣት አካባቢው አስቸጋሪ ነው፤ ቢሞከርም እስካሁን አልተቻለም" - የደሴ ከተማ ፓሊስ በአማራ ክልል ደሴ ከተማ አስተዳደር "መንበረፀሐይ" ተብሎ በሚጠራው የደረቅ ቆሻሻ ማስወገጃ ቦታ ትናንት በደረሰ የመምሸራተት አደጋ እስካሁን ባለው መረጃ የሁለት ሰዎች ህይወት ማለፉን የከተማው ፓሊስ መምሪያ ለቲክቫህ ኢትዮጵያ ገለጸ። የደሴ ከተማ ፓሊስ መምሪያ አዛዥ ኮማንደር ጥላሁን ታደሰ በሰጡን ቃል፣ " አደጋ ደርሷል። አካባቢው የደረቅ ቆሻሻ ማስወገጃ ቦታ ነው። ቆሻሻው ተንሸራቶ በሁለት ሰዎች የሞት አደጋ አድርሷል። ሰዎቹን ለማውጣት አካባቢው አስቸጋሪ ነው፤ ቢሞከርም እስካሁን አልተቻለም " ብለዋል። ከቦታው የወጣው መረጃ፣ ቆሻሻው ተንሸራቶ ሰዎቹን ወደረጅም ገደል እንዳስገባቸውና እንደተጫናቸው፣ አንድ አብሯቸው የነበረ ሰው አራት ጊዜ ተንከባሎ በተዓምር እንደተረፈ ያመላከቱ ሲሆን፣ ኮማንደር ጥላሁን በበኩላቸው፣ " የተደራረበ ቆሻሻ ስለነበር ሲናድ ወደገደል ይዟቸው ሄደና ተጫናቸው። አንድ ሰው ተርፏል " ሲሉ ለቲክቫህ ኢትዮጵያ አረጋግጠዋል። " ሰዎቹን ለማውጣት ሌላ ተጨማሪ አደጋ የሚያስከትል ሁኔታ ነው ያጋጠመን " ያሉት ፓሊስ አዛዡ፣ ለማውጣት ጥረት እየተደረገ መሆኑን ገልጸው፣ " የከተማ አስተዳደሩ ሎዶር ለማቅረብ እየሞከረ ነው፤ ግን ቦታው የሚደረስበት አይደለም፤ ገደሉ ርቀት አለው። አሁንም ወደ ቦታው ልንሄድ ነው " ብለዋል። እስካሁን ባላቸው መረጃ መሰረት ሌላ ጉዳት የደረሰበት ሰው እንደሌለ፣ አንድ ከሟቾች ጋር አብሮ የነበረ ሰው በህይወት መትረፉን ለቲክቫህ ኢትዮጵያ አስረድተዋል። ፓሊስ አዛዡ "አዛሳኝ ነገር ነው የደረሰው፤ በጣም አዝነናል" ብለዋል። ሰዎቹ አደጋ የደረሰባቸው ምን ሊያደርጉ ወደቦታው ሄደው እንደሆነ ስንጠይቃቸው፣ "በአካባቢ ሰው ይሄዳል። አሁን እርግጠኛ ሆኘ እንደህ ነው ማለት አልችልም፤ አብሮ የነበረና ከአደጋው የተረፈውን ሰው መጠየቅና ማረጋገጥ ይጠይቃል" ሲሉ መልሰዋል። ኮማንደር ጥላሁን ባስተላለፉት መልዕክት፣ "በቆሻሻ ማስወገጃ ቦታ ቆሻሻ በየጊዜ ስለሚደፋ በቀላሉ የመናድ ባህሪ አለው። የጠነከረ መሬት አይደለም። ስለዚህ ህብረተሰቡ እንዲህ አይነት ቦታ ላይ ልጆቹን መላክ፤ አዋቂውም በቀላሉ መዳፈር የለበትም" ሲሉ መክረዋል። "ለአካል ጉዳት፣ ለሞት ያጋልጣል። አደጋ የደረሰባቸው ሰዎች ቤተሰቦች ከባድ ሀዘን ነው ያጋጠማቸው። ስለዚህ ሌላውም ሰው ከእንደዚህ ወደቦታው ከመሄድ መቆጠብ አለበት" ሲሉ አሳስበው፣ አደጋ ለደረሰባቸው ሰዎች ቤተሰቦች መጽናናትን ተመኝተዋል። via_tikvah @Addis_News @Addis_News